Lára Óskarsdóttir flytur framboðsræðu sína á landsfundi Sjálfstæðisflokksins mbl.is/Kristinn Ingvarsson

Lára Óskarsdóttir, húsmóðir og íslenskukennari, bað um stuðning landsfundagesta í embætti varaformanns Sjálfstæðisflokksins en hún og Ólöf Nordal eru tvær í kjöri í varaformannsembættið. Þorgerður Katrín Gunnarsdóttir sagði af sér embættinu fyrr á árinu og er enginn starfandi varaformaður í flokknum nú.

Lára segist hafa víðtæka reynslu. Hún hafi reynslu af íþrótta og ungmennastarfi og verið í sveit á árum áður. Hún er menntaður hárgreiðslumeistari og kennaramenntuð. Hún segist hafa miklar skoðanir á menntamálum og stolt af verkum Sjálfstæðisflokksins í þeim málaflokki og hún vilji auka hlut einkaskóla.

Að sögn Láru er hún gift og á fjögur börn. Hún hafi miklar skoðanir á fjölskyldumálum. Sjálfstæðisflokkurinn hafi rutt brautina í mörgum fjölskyldumálum til að mynda hvað varðar feðraorlof. 

Hún vill opna flokkinn en hún fór að starfa með Sjálfstæðisflokknum af kappi fyrir sveitarstjórnarkosningarnar í vor og ákvörðun um að bjóða sig fram sem varaformaður hafi verið tekin á hlaupum í Laugardalnum fyrr í vikunni. 

Lára er á móti Evrópusambandsaðild og segir ekki rétt að þjóðin fari kengbogin í eitthvað samband.