Ferðamenn við Seljalandsfoss. Mynd úr safni. mbl.is/RAX

Búist er við að á bilinu tvö til þrjú þúsund gestir muni mæta á landkynningartónleika, sem hafa yfirskriftina Iceland Inspires, sem verða haldnir á fimmtudagskvöld að Hamragörðum undir Eyjafjöllum, skammt frá Seljalandsfossi. Lögreglan segir allan undirbúning hafa gengið vel.

Sveinn Kristján Rúnarsson, yfirlögregluþjónn á Hvolsvelli, segir í samtali við mbl.is að lögreglan sé í stakk búin til að sinna eftirliti og gæslu á svæðinu.

Aðspurður segir Sveinn Kristján að öll aðstaða muni verða til fyrirmyndar, s.s. salernisaðstaða. „Það verður bætt við hana og það verður fín aðstaða,“ segir hann í samtali við mbl.is. Þá verði einnig seldar léttar veitingar.

Blásið verður til þriggja klukkustunda langrar tónlistarveislu en tónleikarnir verða einn af hápunktum átaksins Inspired by Iceland. Tónleikarnir eru öllum opnir og ókeypis. Svæðið verður opnað kl. 19, tónleikarnir hefjast klukkustund síðar og standa til kl. 23.

Að Hamragörðum koma m.a. fram breska sveitin Spiritualized með íslenskri strengjasveit og kór, Seabear, Amiina, Dikta, Steindór Andersen, Lay Low, Hilmar Örn Hilmarsson, Mammút, Páll á Húsafelli og Parabólur ásamt fleirum. Þá verða einnig sýndar í beinni útsendingu á netinu mynd- og hljóðupptökur með Damien Rice, Glen Hansard, Gus Gus, Hjaltalín, For a Minor Reflection, Retro Stefson o.fl.  

„Við erum ósköp spakir. Það hefur meiri tími farið í að undirbúa helgina, þegar það verður hátíð í Galtalæk,“ segir Sveinn Kristján, sem svarar því játandi að menn líti á tónleikana á fimmtudagskvöld sem létta upphitun.

Lögreglan á von á svipuðum fjölda þangað um helgina. Að sögn Sveins verður gæslan þar mun öflugri. Fleiri lögreglumenn verði á svæðinu, en lögreglan á Hvolsvelli mun njóta aðstoðar lögreglumanna úr öðrum embættum.