Össur heimsækir Færeyinga

Össur Skarphéðinsson utanríkisráðherra heldur í dag til Þórshafnar, þar sem hann mun eiga fund  með Jørgen Niclasen, utanríkisráðherra Færeyja á morgun, 1. júlí. Um er að ræða fund Hoyvíkurráðsins, sem sett var á stofn með Hoyvíkursamningnum, fríverslunarsamningi Íslands og Færeyja.

Þetta kemur fram í tilkynningu frá utanríkisráðuneytinu.

Fram kemur að helsta málið á dagskrá fundarins sé rekstur Hoyvíkursamningsins. Einnig verði fjallað um samskipti landanna við ESB og EFTA, auk þess sem rætt verði um samstarf á sviði heilbrigðismála og ýmis önnur mál er varði hagsmuni landanna.

Þá munu utanríkisráðherrarnir undirrita samkomulag um samstarf á milli utanríkisráðuneytis Íslands og Færeyja á sviði rekstrarmála. Samkomulaginu sé ætlað að vera grundvöllur að stuðningi og ráðgjöf Íslendinga við uppbyggingu utanríkisþjónustu Færeyinga.

Hoyvíkursamningurinn hafi verið í gildi í á fjórða ár og sé víðtækasti viðskiptasamningur sem Ísland hafi gert, segir ennfremur.

Samningurinn varði ekki aðeins hefðbundin viðskipti, heldur sé með honum stefnt að auknu samstarfi á m.a. sviðum menningarmála, orkumála, umhverfismála, heilbrigðismála, fjarskipta og ferðaþjónustu.

• 2 blogg um fréttina

Bloggað um fréttina

• Hecademus: Ísland sem Brussel Norðursins
• Hilmar Guðmundsson: Össur heimsækir Færeyinga