mbl.is/Sverrir

Frumtök, samtök framleiðenda frumlyfja, segja að lyfjaverð á Íslandi hafi lækkað í takt við styrkingu krónunnar. Þau benda á að ef verð á 40 veltuhæstu lyfjapakkningunum, sem hafi verið birt í verðkönnun Lyfjagreiðslunefndar í febrúar, sé borið saman við verð sömu pakkninga í verðskrá nefndarinnar í júlí, komi í ljós að heildsöluverðið hafi lækkað um 15%.

Fram kemur að upplýsingarnar séu byggðar á 40 veltuhæstu lyfjunum á Íslandi sem öll hafi verið með greiðsluþátttöku í febrúar.

„Þann 23. júní sendi Alþýðusamband Íslands (ASÍ) frá sér fréttatilkynningu þess efnis að þrátt fyrir að nokkra styrkingu krónunnar undanfarið hafi verðlag ekki lækkað. Að sögn ASÍ hefði mátt reikna með því að verðlag fylgdi gengi krónunnar með svipuðum hætti og gerðist þegar gengi krónunnar veiktist en þá hækkaði verðlag nokkuð nákvæmlega í takt við veikingu krónunnar,“ segir í tilkynningum frá Frumtökum.

„Heilbrigðisyfirvöld hafa þegar farið í róttækar breytingar á greiðsluþátttökukerfi Sjúkratrygginga Íslands með það að markmiði að lækka lyfjakostnað. Út í þessar aðgerðir er farið þrátt fyrir þá staðreynd að lyf á Íslandi eru fremur ódýr og hafa með styrkingu krónunnar lækkað enn frekar eins og nýjustu tölur LGN sýna, á meðan lækkanir á öðrum vörum láta á sér standa eins og kemur fram í tilkynningu ASÍ,“ segja Frumtök.