Ráðhús Reykjavíkur. Eggert Jóhannesson

Borgarráð Reykjavíkur samþykkti tillögur nýs meirihluta borgarstjórnar að breytingum á framkvæmdaáætlun Reykjavíkurborgar á aukafundi sínum síðdegis. Þær fela í sér breytta forgangsröðun þannig að 500 milljónum króna verður nú veitt í margvísleg mannaflsfrek verkefni víðs vegar um borgina.

Samkvæmt mati Framkvæmda- og eignasviðs Reykjavíkurborgar þýðir þetta að allt að 150 manns geti fengið vinnu til áramóta.

Þessari fjárhæð verður m.a. varið til uppkaupa á eignum og  bætist  hún við framkvæmdir og viðhaldsverkefni sem þegar voru á áætlun auk 150 milljóna króna sem ætlaðar voru til sérstaks atvinnuátaks í samvinnu við Vinnumálastofnun. Alls verður framkvæmt á vegum Reykjavíkurborgar fyrir 6,5 milljarða í ár og eru framkvæmdir fyrirtækja borgarinnar þá ekki meðtaldar.  

Fram kemur í tilkynningu frá Reykjavíkurborg, að alls verði 250 milljónum króna varið í opin leiksvæði, græn svæði og endurgerð göngustíga. Nauðsynlegu viðhaldi í ýmsum skólum og leikskólum verði flýtt og sérstök áhersla lögð á löngu tímabærar framkvæmdir í Breiðholtshverfi. Þessar áherslubreytingar á framkvæmdaráætlun munu leiða til þess að fleiri fá atvinnu fyrir tilverknað Reykjavíkurborgar.  

Tekið er fram, að ekki sé um viðbótarfjármagn að ræða heldur tilflutning verkefna innan framkvæmdaáætlunar. Meginbreytingin felist í því að lagt sé til að áætlað fjármagn til kaupa á eignum í tengslum við skipulagsbreytingar verði nýtt í mannaflsfrekar framkvæmdir.