Ari Matthíasson

Ari Matthíasson leikari hefur verið ráðinn framkvæmdastjóri Þjóðleikhússins. Starfið var auglýst í lok maí og rann umsóknarfrestur út 14. júní sl. 25 umsóknir bárust um starfið og mun Ari hefja störf þegar leikhúsið tekur til starfa að loknu sumarleyfi, samkvæmt fréttatilkynningu.

„Ari er menntaður leikari, með BFA gráðu í leiklist frá Leiklistarskóla Íslands, MBA gráðu í stjórnun og rekstri frá Háskólanum í Reykjavík og M.Sc gráðu í hagfræði frá Háskóla Íslands.

Ari starfaði sem leikari í fjölda ára og tók meðal annars þátt í um 40 uppfærslum í atvinnuleikhúsum, mest með Leikfélagi Reykjavíkur, þar sem hann var fastráðinn í 10 ár. Hann hefur leikið í kvikmyndum og sjónvarpi og unnið sem leikstjóri, auk þess að hafa staðið að framleiðslu sýninga og leikhúsrekstri.

Utan leikhússins hefur Ari einnig fjölbreytta starfsreynslu, en hann hefur starfað sem framkvæmdastjóri með ábyrgð á rekstri og áætlanagerð, unnið að stefnumótun og markaðsráðgjöf, komið að verkefnastjórnun ýmissa fyrirtækja og stofnana, auk þess að hafa reynslu af opinberri stjórnsýslu. Ari hefur einnig starfað sem stundakennari við Háskólann í Reykjavík.

Ari hefur þannig bæði fjölbreytta menntun og víðtæka reynslu sem ætti að nýtast honum vel í starfi sem framkvæmdastjóri Þjóðleikhússins," segir í tilkynningunni.