Golli / Kjartan Þorbjörnsson

Í fréttum Stöðvar 2 kom fram að sérfræðingar bankans hefðu spáð því að fasteignaverð á höfuðborgarssvæðinu færi niður í um 150 þúsund krónur á fermetra á næstu misserum en það er nú  um 220 þúsund krónur. Með því að spá svo lágu verði hafi nýi Landsbankinn getað yfirtekið lánasafn gamla Landsbankans með talsverðum afslætti.

Landsbankinn segir í athugasemd, að við mat á færslu eigna milli gamla bankans og nýja bankans, hafi verið stuðst við ákveðnar sviðsmyndir eða reiknilíkön sem byggð eru m.a. á fasteignamati og öðrum gögnum um fasteignamarkað.

„Í einni sviðsmyndanna var ráð fyrir því gert að bankar þyrftu að leysa til sín íbúðir í stórum stíl og eiga þær um nokkurn tíma með tilheyrandi verðfalli á markaði. Í þeirri sviðsmynd sem segja má að sé sú dekksta, var miðað við að Landsbankinn gæti ekki búist við að endurheimta meira en sem nemur 150 þúsund krónum á fermetra eftir að allur kostnaður væri reiknaður. Sú tala felur ekki í sér neinskonar almenna spá um verðþróun.

Þetta ástand hefur aldrei skapast, enda hafa bankar og fjármálastofnanir ekki leyst til sín þann fjölda íbúða sem ofangreint dæmi byggðist á.

Landsbankinn hefur upplýst að einstaklingslán hafi verið keypt af Skilanefnd Landsbanka Íslands hf. fyrir um 66% af nafnvirði þeirra að meðaltali. Lítill munur er á innlendum og erlendum lánum hvað þetta varðar.

Allt tal um að bankinn hafi spáð því að almennt verð á fasteignamarkaði færi í 150 þúsund krónur pr. fermetra eða að bankinn hafi tekið yfir tiltekin fasteignalán á 25% af raunvirði er fjarri öllum sanni," segir í athugasemd Landsbankans.