Kleifabergið er nú á heimleið úr Barentshafi með fullfermi.

Fiskiskipið Kleifaberg ÓF-2 er væntanlegt til Reykjavíkur í kringum miðnætti á föstudagskvöld með fullfermi úr Barentshafinu. Gróflega áætlað er aflaverðmætið um 300 milljónir króna og fékkst aflinn á 18 veiðidögum. Siglingin af miðunum tekur um 5 sólarhringa og alls verður túrinn um 28 daga langur.

„Þetta hefur gengið mjög vel,“ sagði Skarphéðinn Aðalsteinsson bátsmaður á Kleifaberginu. Afli upp úr sjó var um 1020 tonn og voru 99% þess sem fékkst þorskur.

Kleifabergið var aðallega að veiðum austur af gráa svæðinu svonefnda, sameiginlegu hafsvæði Norðmanna og Rússa, eða austur af Vardö í Noregi.

„Þetta var bara þokkalega góður fiskur og stór hluti unninn á Ameríku,“ sagði Skarphéðinn. Þá er fiskurinn verkaður í roðlaus flök og beinlaus og einnig roðlaus með beinum.

„Það er óhemju vinna að taka þetta magn á Ameríku,“ sagði Skarphéðinn.  Allt að 55 tonn fóru í gegnum vinnsluna á sólarhring. Í áhöfninni eru 26 manns. „Þetta er ekki gert nema með sameiginlegu átaki. Það eru hreinar línur. Það þarf að vera mjög góð áhöfn til að rúlla svona í gegn.“

Auk Kleifabergs ÓF var Björgvin EA einnig í Barentshafinu að veiðum á svipuðum tíma en Björgvin EA fór aðeins fyrr heim. Togarinn Sigurbjörg ÓF er nýkominn í Barentshafið. 

Kleifabergið fór eftir áramótin tvo túra í norsku lögsöguna. Skarphéðinn taldi líklegast að skipið fari næst til makrílveiða. Brim hf. gerir Kleifabergið út og skipstjóri í túrnum er Víðir Jónsson.

Flökin snyrt um borð í Kleifaberginu. Myndin er úr myndasafni. mbl.is