Guðmundur Týr Þórarinsson. Valdís Þórðardóttir

Forstöðumaður Götusmiðjunnar segir, að hann muni eftir 15. júlí opinbera nýjar upplýsingar, sem geri það að verkum að ráðuneytinu mun verða skylt að taka mál stofnunarinnar til umfjöllunar á nýjan leik.

Félagsmálaráðuneytið hefur komist að þeirri niðurstöðu, að barnaverndaryfirvöld hafi farið að málsmeðferðarreglum barnaverndarlaga og stjórnsýslulaga við rannsókn á málefnum Götusmiðjunnar en börn, sem þar voru í vistun, voru flutt þaðan 25. júní.

Guðmundur Týr Þórarinsson, forstöðumaður Götusmiðjunnar, segir í yfirlýsingu sem hann sendi frá sér í kvöld, að hann hafi gengist undir það skilyrði í samningaviðræðum við Barnaverndarstofu að hann fjallaði ekki efnislega um málið á meðan þær viðræður stæðu yfir.  

„Í ljósi þessa skilyrðis Barnaverndarstofu verður að teljast furðuleg
framganga ráðuneytisins að birta niðurstöðu þessa á heimasíðu sinni á þessum tíma, enda mátti ráðherra vera það fullljóst að tilkynningin vekti eftirtekt og athygli fjölmiðla," segir Guðmundur m.a. í yfirlýsingu sinni.