Ómar Óskarsson

Mannanafnanefnd hefur hafnað ósk um að karlmannsnafnið Fenris verði skráð á mannanafnaskrá, hvorki sem eiginnafn né millinafn. Segir nefndin, að  orðmyndin Fenris sé eignarfallsmynd nafnsins Fenrir sem þekkt sé úr norrænni goðafræði og er á mannanafnaskrá. Að nota Fenris í nefnifalli stríði gegn hefð nafnsins Fenrir með sama hætti og nöfn eins og Guðmund og Þorstein séu óheimil. 

Mannanafnanefnd hefur einnig hafnað nöfnunum Duncan og Harriet þar sem þau séu ekki í samræmi við íslenskar ritreglur og hafi ekki öðlast hefð hér á landi.  Einnig hafnaði nefndin kvenmannsnafninu Freyu og taldi þann rithátt ekki hafa öðlast hefð hér.

Nefndin féllst á eftirfarandi nöfn: Mjöllnir, Gói, Glóa,  Refur og Gunnarr. Varðandi síðasta nafnið segir nefndin, að eiginnafnið Gunnarr komi  fyrir, með þeim rithætti, í ýmsum alþekktum útgáfum, s.s. útgáfu Hins íslenzka fornritafélags að Brennu-Njáls sögu. Sé því hægt að líta svo á að hefð sé fyrir nafninu sem beygist Gunnarr-Gunnar-Gunnari-Gunnars.