Eflaust blótuðu einhverjir rigningunni sem féll víða um land í gærdag minnugir þess að 13. júlí hefjast hundadagar. Því er stundum haldið fram, að ef rigni á fyrsta hundadegi þá rigni þá alla en einnig þekkist trú á að með hundadögum breyti jafnan um veður og hafi verið þurrt fyrir þá verði vott og svo hið gagnstæða.

Hundadagarnir eru alþjóðlegir og samkvæmt því sem segir í almanaki Háskóla Íslandi kemur nafnið frá Rómverjum, sem sóttu hugmyndina til Forn-Grikkja. „Grikkir settu sumarhitana í samband við hundastjörnuna (Síríus), sem um þetta leyti árs fór að sjást á morgunhimninum.“ Einnig er það nokkuð á reiki hvenær hundadagar hefjast og hversu lengi þeir standa yfir. Í íslenska almanakinu eru þeir reiknaðir frá 13. júlí til 23. ágúst en í því norska og danska frá 23. júlí.

Hvað hjátrúna um veðrabrigði tengd hundadögum varðar virðist sem Íslendingar taki þá sem hentar hverju sinni, alla vega að mati Trausta Jónssonar veðurfræðings. „Fyrir 25-30 árum var mjög mikið af rigningarsumrum á Suðurlandi og þá rigndi jafnt á hundadaga eins og aðra daga, þannig að það þótti sýna það hvað spárnar væru góðar. Undanfarin ár hefur verið þurrt framan af sumri og rignt talsvert seinni part sumars,“ segir Trausti en tekur fram að rigningin komi þó ekki með hundadögum en fremur síðar.

Árni Björnsson þjóðháttafræðingur segir hjátrúna um hundadaga og veðrið alls ekki íslenska og að hún hafi varla verið mjög útbreidd á Íslandi. Hann segir að í erlendum almanökum, sem oft hafi verið nokkurs konar handbækur bænda, í Þýskalandi og Danmörku, hafi verið ýmis konar munnmæli og sögur af hjátrúm sem þessum. „Þetta þýddu menn svo hrátt í handrit og maður rekst á þetta í handritum frá 17. og 18. öld á Landsbókasafni. Þetta átti ekkert skylt við íslenskar kringumstæður en var miðað við Mið-Evrópu þar sem eitthvert vit gat verið í þessu, s.s. þar sem veður er stöðugra. Síðan var þetta fært í rit sem íslensk hjátrú. En það er misskilningur.“

Hvað sem öðru líður eru líkur á síðdegisskúrum í dag og hugsanlega á morgun. Hins vegar er spáð bjartviðri suðvestanlands á föstudag og laugardag auk þess sem þar verður einnig hvað hlýjast.

• „Síðan var þetta fært í rit sem íslensk hjátrú. En það er misskilningur.“