Sjávarútvegsráðherra, Jón Bjarnason, ákvað í gær að aflamark þorsks yrði 160 þúsund tonn á næsta fiskveiðiári. Er það í samræmi við aflareglu Hafrannsóknastofnunar og aukning um 10.000 tonn frá því síðast en jafnframt hefur verið ákveðið að skipa samráðshóp til að yfirfara aflaregluna.

Breytingar sem gerðar voru á henni í fyrra eru gagnrýndar af helstu hagsmunaaðilum í sjávarútvegi. „Við teljum að leyfa hefði átt a.m.k. 180 þúsund tonn og að endurskoða þurfi aflaregluna sem var ákveðin í fyrra,“ segir Friðrik J. Arngrímsson, framkvæmdastjóri Landssambands íslenskra útvegsmanna, LÍU, í Morgunblaðinu í dag.

Sævar Gunnarsson, formaður Sjómannasambandsins, er einnig á því að auka hefði mátt þorskkvótann. En í reynd séu stjórnvöld bundin af því að fara eftir aflareglunni þótt hann sé sjálfur ekki sáttur við hana; orðspor Íslendinga sem ábyrgrar veiðiþjóðar byggist á því að fara eftir reglunni.