Ætihvönn blómstrar og myndar fræ í Surtsey í fyrsta sinn. www.ni.is/Borgþór Magnússon

Færri tegundir háplantna fundust í leiðangri vísindamanna til Surtseyjar fyrr í þessum mánuði en fundist í rannsóknarleiðangri í fyrra. Þetta var þriðja árið í röð sem háplöntum fækkaði. Þetta kemur fram í frétt Náttúrufræðistofnunar Íslands um Surtseyjarleiðangurinn 2010.

Alls fundust nú 60 tegundir háplantna á lífi í Surtsey og hafði þeim fækkað um eina frá síðasta ári. „Allt voru þetta tegundir sem áður höfðu fundist í eynni en enginn nýr landnemi kom í leitirnar. Frá árinu 1965 hafa fundist 69 tegundir háplantna í eynni en ekki hafa þær allar náð að nema þar land. Árið 2007 var tímabundnu hámarki náð en þá fundust 65 tegundir á lífi.

Frá þeim tíma hefur tegundum fækkað um eina til tvær á ári. Það sem vakti einna mesta athygli í ferðinni var að ætihvönn hefur í fyrsta sinn náð að blómstra í Surtsey,“ segir í frétt Náttúrufræðistofnunar.

Þessi niðurstaða vekur spurningar um hvort hámarki háplantna hafi verið náð og að tekið sé að halla undan fæti hvað fjölda þeirra varðar. „Gróður hafði hins vegar þétt sig og færst út í fuglabyggðinni á suðurhluta eyjarinnar. Varp fugla var með minna móti en hins vegar bar mikið á smádýrum og fundust nýjar tegundir eins og undanfarin ár,“ segir m.a. í frétt Náttúrufræðistofnunar.

Farið var í árlega ferð Náttúrufræðistofnunar Íslands til Surtseyjar dagana 9.-16. júlí 2010. Einnig var komið við í úteyjunum Álsey og Elliðaey. Fjórir starfsmenn Náttúrufræðistofnunar Íslands voru í leiðangrinum, auk þátttakenda frá Landbúnaðarháskóla Íslands, Landgræðslunni, Háskóla Íslands og Kaupmannahafnarháskóla.

Leiðangurinn var farinn í samvinnu við Surtseyjarfélagið og Umhverfisstofnun en Náttúrustofa Suðurlands í Vestmannaeyjum skipulagði ferðirnar í Álsey og Elliðaey.