Héraðsdómur Reykjavíkur. mbl.is/Ómar

Héraðsdómur Reykjavíkur hefur dæmt konu í 3 mánaða skilorðsbundið fangelsi fyrir að snúa upp á fót 4 vikna gamals sonar síns með þeim afleiðingum að drengurinn lærleggsbrotnaði. Konan var einnig dæmd til að greiða drengnum 300 þúsund krónur í bætur og rúmar 900 þúsund krónur í málskostnað. 

Þetta gerðist í nóvember sl. á heimili mæðgnanna í Reykjavík. Konan bar ekki vitni fyrir dómi en sagðist í yfirheyrslu hjá lögreglu hafa verið að skipta á drengnum þegar hann velti sér út af skiptiborðinu og datt niður af borðinu.

Dómurinn taldi skýringar konunnar ekki trúverðugar og taldi hafið yfir skynsamlegan vafa, með vísan til vitnisburða lækna, að lærleggsbrotið hafi orsakast af harkalegri meðhöndlun á drengnum. Hefði konan gerst sek um alvarlegt brot gegn drengnum og brugðist gróflega forsjár- og umönnunarskyldum sínum. Fram kemur í dómnum, að systir drengsins, hefði greinst með brot á fimm beinum fimm mánuðum áður.

Við ákvörðun refsingar  var m.a. litið til vitnisburðar sálfræðings um að konan hafi þurft að stríða við mjög mikla og langvarandi erfiðleika í æsku sem markað hafi hana fyrir lífstíð. Hafi hún mælst með talsverðan misþroska, almenn greind hafi mælst á stigi vægrar greindarskerðingar og ljóst sé að hún eigi við að glíma talsverðar tilfinningasveiflur.

Börnin dvelja nú hjá föður sínum en foreldrarnir slitu samvistum eftir að drengurinn lærbrotnaði.