Horft yfir Tjörnina í Reykjavík. mbl.is/Golli

Húsaleiga hefur hækkað á höfuðborgarsvæðinu að því er fram kemur í nýrri könnun Neytendasamtakanna í júlí. Fram kemur að að ef einungis sé litið til fermetraverðs hafi tveggja herbergja íbúðir lækkað í verði en hækkun annarra eigna sé á bilinu 3,9-17,5%. Stærstu eignirnar hafi hækkað mest.

Samtökin könnuðu síðast leiguverð í febrúar sl.

Fram kemur að meðalverð á tveggja herbergja íbúð, sem sé 65 fermetrar að stærð, sé nú 107.122 kr. Í febrúar hafi meðalverðið verið 100.692 kr. Hæsta verð í könnuninni er 159.000 kr. og það lægsta er 55.000 kr.

Meðalverð á þriggja herbergja herbergja íbúð, sem er 90 fermetrar að stærð, er nú 133.138 kr. Meðalverð í febrúar var 127.178 kr. Hæsta verðið er 220.000 og það lægsta 70.000 kr.

Meðalverð á fimm herbergja íbúð, sem er 159 fermetrar að stærð, er 198.700 kr. Í febrúar var verðið 173.739 kr. Hæsta verð er 350.000 kr og það lægsta er 119.000 kr.

Fram kemur á vef Neytendasamtakanna að kannað hafi verið meðalverð á þeim íbúðum sem hafi verið boðnar til leigu 26. júlí sl. 

Einungis hafi verið kannað verð á leiguíbúðum á höfuðborgarsvæðinu (þ.e. Reykjavík, Kópavogi, Garðabæ, Hafnarfirði, Álftanesi, Seltjarnarnesi og Mosfellsbæ).

Einungis hafi verið kannaðar íbúðir á frjálsum markaði, en ekki tekið tillit til félagslegra íbúða, námsmannaíbúða eða íbúða fyrir eldri borgara.

Þá var ekki tekinn með í reikninginn kostnaður sem kunni að skapast vegna rafmagns, hita eða hússjóðs, heldur einungis leiguverðið sjálft.