Frá fundi allsherjarþings SÞ. Reuters

Jón Pétur Jónsson

Ísland var eitt þeirra ríkja sem sátu hjá þegar allsherjarþing Sameinuðu þjóðanna samþykkti ályktun um réttindi til vatns og hreinlætis. Skv. upplýsingum frá íslenska utanríkisráðuneytinu ákvað Ísland að sitja hjá þar sem hætta sé talin á að ályktunin geti grafið undan samkomulagi um vatnsréttindi sem Mannréttindaráð SÞ vinni að.

Utanríkisráðuneytið telur að ályktunin eigi heima á vettvangi Mannréttindaráðs Sameinuðu þjóðanna. Ráðuneytið tekur jafnframt fram að Ísland styðji eindregið að aðgangur að hreinu vatni teljist vera  mannréttindi.

Ráðuneytið bendir á, að meirihluti ríkja Evrópusambandsins, eða 16 ríki, hafi setið hjá í atkvæðagreiðslunni. Það hafi einnig meirihluti Norðurlandanna gert: Ísland, Danmörk og Svíþjóð en Finnland og Noregur greiddu atkvæði með ályktuninni.

Fram hafi komið í máli nánast allra þeirra ríkja, sem hafi tekið til máls eftir atkvæðagreiðsluna, hvort sem ríkin höfðu greitt með ályktuninni eða setið hjá, að almenn óánægja væri með ferlið og innihald ályktunarinnar.

Aðildarríkin hafi talið að ferlið ætti að eiga sér stað í Mannréttindaráðinu í Genf og það gæti teflt umræðum þar í hættu. 

Þá segir ráðuneytið að engin lagaleg stoð sé fyrir ályktuninni og hún taki ekki á skuldbindingum ríkja. Einnig hafi verið mikið rætt um það að samningaviðræður hafi ekki farið fram á sem árangursríkastan og gagnsæjan hátt, þar sem tími hafi verið af skornum skammti. Ekki hafi verið tekið tillit til tillagna aðildarríkja, og ekki hafi verið sóst eftir samhljóða samkomulagi um þetta málefni.