Viðskiptaráð Íslands.

Viðskiptaráð Íslands gagnrýnir íslensk stjórnvöld fyrir stefnuleysi og ákvarðanafælni um leið og það spyr hvort Ísland sé opið fyrir fjárfestingu. Þá segir það að pólitísk afskipti af einstaka fjárfestingum séu ekki til þess fallin að stuðla að því að efla hagvöxt og lífskjör á Íslandi.

Viðskiptaráðið bendir á að fjárfesting innlendra aðila hafi dregist mikið saman frá bankahruni auk þess sem erlend fjárfesting hafi verið í lágmarki. „Til að byrja með var landið hreinlega lokað fyrir erlendri fjárfestingu, en það hefur nú færst að einhverju leyti til betri vegar,“ segir Viðskiptaráðið.

Það spyr jafnframt hvort erlent fjármagn sé ekki velkomið til landsins. Bent er á að Ísland sé í öðru sæti á lista yfir þau aðildarríki Efnahags- og framfarastofnunar Evrópu (OECD) sem hafi hvað mestar takmarkanir á beinni fjárfestingu erlendra aðila. Mestu hömlurnar séu í Kína, en næst á eftir Íslandi komi Rússland og Sádi-Arabía.

Þá segir ráðið að atburðir undanfarinna vikna muni ekki efla tiltrú erlendra fjárfesta á Íslandi sem fjárfestingarkosts.

„Aðgerðir hins opinbera að undanförnu vekja upp áleitnar spurningar um forgangsröðun stjórnvalda í ljósi þess að kröftum þeirra er beint að eðlilegum viðskiptasamningum sem stuðla að aukinni atvinnuuppbyggingu hérlendis. Hringlandaháttur, stefnuleysi og ákvarðanafælni í stórum og mikilvægum málum er að gera mörgum aðilum í atvinnulífinu erfitt um vik,“ segir Viðskiptaráðið.

Nánar hér.