Muffins kökurnar voru sannarlega skrautlega í muffinsboðinu í Lystigarðinum á Akureyri. mbl.is/Þorgeir Baldursson

„Þetta hefur gengið yndislega vel,“ sagði Margrét Blöndal, framkvæmdastjóri hátíðarinnar Ein með öllu á Akureyri. Hún sagði að hátíðin hafi farið vel af stað í gær og gengið vel í nótt. Þúsundir gesta eru í bænum og töluvert mikið fleira á tjaldsvæðum en undanfarin ár. 

Í hádeginu í dag var boðið upp á muffins og tónleika í Lystigarðinum á Akureyri. Mæður á Akureyri hafa bakað muffins í þúsundatali og verða þær seldar til ágóða  fyrir fæðingardeild FSA.

„Þetta er svo flott - alveg geggjað. Það voru 50-100 mömmur í bænum sem bökuðu 25-50 muffins hver. Og þvílíkar skreytingar! Hér er búið að prófa uppskriftir og senda á milli og skoða bækur, Muffinsbækurnar hafa gengið á milli húsa. Þetta er eitt af ævintýrunum í kringum þessa hátíð sem gerist bara,“ sagði Margrét.

Í lok skemmtunarinnar var upplýst að selst hefðu muffins fyrir rúmlega
200 þúsund krónur og svo voru boðnar upp „fimm á fati" - þar sem voru fimm
glæsilegar muffins kökur á leirdiski sem Margrét Jónsdóttir leirlistakona
gerði. Hæsta boð var 70 þúsund krónur en þegar konan sem var hæstbjóðandi
sótti diskinn kom hún þeim boðum á framfæri við Margréti Blöndal og
Ingu Þöll Þórgnýsdóttur, bæjarlögmann sem sá um uppboðið, að hún myndi
greiða 100 þúsund fyrir.

Alls söfnuðust því á fjórða hundrað þúsund krónur sem renna til
Fæðingardeildar Sjúkrahússins á Akureyri.