Björgunarsveitarmenn á hálendisvakt. mbl.is

Björgunarsveitir Slysvarnafélagsins Landsbjargar björguðu manni úr jökulá fyrir norðan Jökulheima, vestan við Vatnajökul, á sjötta tímanum í kvöld. Maðurinn hafði ekið fjórhjóli sínu út í jökulá og fest það. Hann beið björgunar í þrjá tíma, en illa gekk að finna manninn.

Tvær björgunarsveitir sem taka þátt í hálendisvaktinni, Hjálparsveit skáta í Reykjavík og Björgunarsveitin Núpar frá Kópaskeri, svöruðu kallinu en þær voru staddar á Sprengisandsleið og við Landmannalaugar.

Maðurinn hafði ekið fjórhjóli út í á sem kemur úr Sylgjujökli í Vatnajökli og festist hjólið. Ferðafélagi mannsins hafði samband við Neyðarlínu og óskaði eftir aðstoð. Þegar björgunarsveitir komu á svæðið var hafist handa við að bjarga manninum úr ánni og gekk það greiðlega fyrir sig. Samkvæmt upplýsingum frá Slysavarnafélaginu Landsbjörgu mátti ekki tæpara standa því maðurinn var orðinn kaldur og hrakinn eftir dvöl sína á hjólinu í köldu jökulvatninu í meira en þrjár klukkustundir.

Um leið og hann var kominn á land var hann settur í þurr föt og hlúið að honum. Maðurinn hressist fljótt og var hjólinu bjargað úr ánni. Björgunarsveitirnar eru nú á leið til byggða ásamt leiðangursmönnum og gengur ferðin vel.

Slysavarnafélagið Landsbjörg segir, að aukin útbreiðsla GSM símakerfisins hafi enn og aftur sannað gildi sitt. Útbreiðslan hafi aukist stórlega á hálendinu undafarið og stóraukið öryggi fólks  á svæðinu.