Sauðárkrókur. www.mats.is

Um 160 manns voru á dansleik sem haldinn var í tengslum við Fákaflug 2010 á Vindheimamelum í Skagafirði í gærkvöldi. Þá voru um 300 manns á svæðinu, að sögn lögreglunnar. Allt fór þar vel fram og vandræðalaust.

Umferðin hefur gengið vel í umdæmi lögreglunnar á Sauðárkróki. Í gær voru höfð afskipti af nokkrum ökumönnum. Einir 6-7 voru teknir fyrir of hraðan akstur og sá sem hraðast ók var á 118 km hraða.

Umferðin var þétt og einn og einn reyndi að sprengja sig út úr bílalestinni. Nokkrir voru gómaðir fyrir áhættusöm tilþrif af því tagi og var reynt að fá þá til að hemja sig og láta af þessari hegðun sem skapar hættu fyrir aðra á vegunum.

Í morgun hafði lögreglan afskipti af ökumanni sem átti leið um Þverárfjallsveg. Öðrum vegfarendum þótti aksturslag hans athugavert. Lögreglan hafði tal af ökumanninum og kom í ljós að hann var langþreyttur. Einnig var hann á lyfsseðilsskyldum lyfjum sem gerðu talsmáta hans drafandi, líkt og hann væri ölvaður.

Læknir var fenginn til að meta ástand mannsins. Hann taldi lögregluna ekki hafa neitt í höndunum til að hindra frekari för mannsins enda engin lyfjanna þríhyrningsmerkt þótt þau yllu drafandi talsmáta. Þau ættu ekki að slæva dómgreind hans til aksturs.

Maðurinn fór til vinafólks að hvíla sig og ætlar að halda ferðinni áfram síðar í dag eftir að hafa hvílt sig.