Mikill mannfjöldi var á Ráðhústorginu á Akureyri síðdegis í gær. mbl.is/Þorgeir Baldursson

Helstu útihátíðir á Norðausturlandi hafa gengið mjög vel fram að þessu stemmningin góð. Sól og blíða er nú á Akureyri þar sem Ein með öllu/þriggja daga vakt fer fram en nokkuð skýjað er austar þar sem Dragspilsaveisla fer fram á Brúarási og Neistaflug í Neskaupstað. Þó er tiltölulega hlýtt og þurrt.

„Þetta er búið að ganga eins og í sögu og fer bara batnandi því nú er bara komin glampandi sól,“ segir Margrét Blöndal, einn aðstandenda hátíðarinnar á Akureyri. Hún segir góðan anda í gestum og að margt sé um manninn í bænum.

Fleiri eru á tjaldstæðunum nú en í fyrra en Margrét vill ekki fullyrða um hvort fleiri gestir séu samtals á hátíðinni í ár. „Ég veit bara að þetta eru mörg þúsund,“ segir Margrét.

Að sögn Bjarts Sæmundssonar hefur Neistaflug á Neskaupsstað gengið mjög vel og hnökralítið. Nokkur þoka hafi verið yfir svæðinu í gær en stemmningin hafi verið og sé góð.

„Hátíðin hefur aldrei verið eins fjölmenn og núna,“ segir Jón Sigfússon, einn skipuleggjenda Dragspilsahátíðar á Brúarási. Hátíðin er nú haldin í áttunda sinn og hefur að sögn Jóns gengið hnökralaust fyrir sig. Um 250 manns létu sjá sig á balli sem fram fór í gærkvöld og stóð til klukkan þrjú í nótt.

Leikinn var mýrarbolti að hætti Ísfirðinga á Neistaflugi Kristín Ágústsdóttir