„Fáum við afsökunarbeiðni, endurgreiðslu eða skaðabætur? Finnst Iceland Express kannski nóg að hafa sett okkur á hótel og að við eigum að prísa okkur sæl með það?“ spyr Guðný Einarsdóttir, sem segist ekki vita hvort hún eigi að gráta eða hlæja yfir þjónustu flugfélagsins.

Hún átti bókað kvöldflug frá Stanstead-flugvelli til Keflavíkur á laugardag. Eftir að hún hafði fundið innritunarborðið, sem var ómerkt, tjáðu flugvallarstarfsmenn henni, að fugl hefði farið í hreyfil vélarinnar og fluginu verið aflýst. Var farþegum tjáð að þeim yrði komið frítt á hótel og svo yrði flogið frá Gatwick. Svo kom í ljós að þeir voru rukkaðir fyrir ferðina á hótelið, eftir þriggja tíma bið eftir rútunni.

Á hótelinu fékk fólk 15 punda inneignarnótur fyrir mat svo Guðný, sem var með tvö börn, þurfti að leggja út fyrir mat frá sunnudagsmorgni, að því er fram kemur í umfjöllun um þetta mál í Morgunblaðinu í dag.