Í tilkynningu frá Íslenskri getspá segir að vinningshafarnir tveir sem skiptu með sér 1. vinningi í Lottóinu á laugardag séu báðir komnir fram. Þeir fengu rúmlega 26 milljónir króna í sinn hlut.

Annan vinningsmiðann eiga hjón á besta aldri en þau keyptu miðann í Happahúsinu, Kringlunni á laugardaginn. 

Að þeirra sögn eru þau varla ennþá búin að átta sig á þessu, en þau hafa spilað reglulega í Lottóinu í nokkurn tíma en aldrei unnið neitt að ráði.

Konan vakti manninn sinn því með gleðifréttir á sunnudagsmorguninn þegar hún tilkynnti honum að þau væru með allar tölurnar réttar á lottómiðanum sínum og væru búin að vinna rúmlega 26 milljónir.

Hinn vinningsmiðann á ung kona en hún er með tölurnar sínar í áskrift.  Hún var ekki búin að athuga miðann sinn þegar Íslensk getspá hafði samband við hana og komu fréttirnar henni mjög gleðilega á óvart. 

Hún átti reyndar mjög bágt með að trúa þessu og var alveg viss um að einhver væri að stríða sér.
Þetta er þó ekki fyrsti vinningur ársins hjá þessari ungu konu því að hún eignaðist son í vor og er það annað barn hennar og eiginmanns hennar.