Fjölskylduhátíðin Fiskidagurinn mikli á Dalvík var formlega sett í gær en hátíðin á 10 ára afmæli í ár og mikið um að vera. Hátíðin hefur notið gríðarlegra vinsælda og hófst umferð til Dalvíkur í byrjun vikunnar. Fiskidagurinn sjálfur er á laugardeginum og verður þá þétt dagskrá frá klukkan 11-17.

„Við erum með sama ramma en það verður allt veglegra í ár,“ segir Júlíus Júlíusson, framkvæmdastjóri Fiskidagsins, aðspurður hvort eitthvað verði með öðruvísi brag í ár í tilefni af afmælinu. Einnig verður sérstök kvölddagskrá á laugardagskvöldinu í boði Samherja, sem er þá sérstaklega í tilefni afmælisins. „Öll dagskrá hátíðarinnar er veigameiri alla vikuna.“

Mikill matur er á hátíðinni og að sjálfsögðu aðeins fiskur. „Stærsti súpupottur landsins sem er 1.200 lítrar verður þarna og Bjarni í Nings og félagar munu fylla hann af austurlenskri súpu. Við ætlum líka að baka stærstu pitsur á Íslandi, 18 stykki sem verða um fimm fermetrar hver,“ segir Júlíus en pitsan er samvinnuverkefni Greifans, Ektafisks og Promens. „Norðurskel í Hrísey er líka 10 ára og ætla þeir að gefa skel. Sushi verður þarna í boði Friðriks V. og Humarhússins. Fiskborgarar verða grillaðir á stærsta færibandagrilli landsins.“ Það er því ljóst að enginn verður svangur á Fiskideginum mikla og allur matur er ókeypis. „Þetta er allt frítt hér og það er bannað að taka upp veskið!“ segir Júlíus hress.