Fyrstu farþegarnir ganga inn í flugstöðina á Húsavíkurflugvelli í dag. mbl.is/Atli

Isavia ohf., sem annast rekstur flugvalla á Íslandi, segir að samkvæmt lögfræðiáliti, sem stofnunin hefur aflað sér hjá Samtökum atvinnulífsins, sé það ekki brot á vinnulöggjöfinni að flytja slökkvibíl Isavia frá flugvellinum á Akureyri til Húsavíkur eins og gert var í morgun.

Slökkvilið Akureyrar annast flugvallarslökkviþjónustu á Akureyrarflugvelli samkvæmt samningi við Isavia. Vegna verkfallsaðgerða Landssambands slökkviliðs og sjúkraflutningamanna í dag fór Flugfélag Íslands þess á leit við Isavia að flugvöllurinn á Húsavík yrði opnaður fyrir flugvélar félagsins. Samþykkti Isavia að verða við þessari beiðni og flutti slökkvibíl sinn frá flugvellinum á Akureyri til Húsavíkur.

Segir Isavia, að venjubundið viðbragðsstig verði viðhaft vegna sjúkra- og neyðarflugs á Akureyrarflugvelli og flugvöllurinn sé opinn umferð, sem ekki krefjist viðbúnaðarstigs slökkviþjónustu.
 
Isavia segir að verkfall slökkviliðsmanna sé vegna kjaradeilu Landssambands slökkviliðs- og sjúkraflutningamanna við launanefnd sveitarfélaga. Isavia sé ekki aðili að þessari deilu og starfsmenn Isavia á flugvellinum á Húsavík, sem sinni viðbúnaðarþjónustu, séu ekki félagar í landssambandinu og því ekki í verkfalli.