Slökkviliðsmenn í húsi ríkissáttasemjara í gær. Ómar Óskarsson

Samninganefndir launanefndar sveitarfélaga og Landssambands slökkviliðs- og sjúkraflutningamanna féllust á það á samningafundi í gær að skoða í sameiningu ýmis töluleg gögn sem ágreiningur hefur verið um.

Þetta kemur fram í tilkynningu frá launanefndinni þar sem fagnað er  þeim samstarfsvilja sem fulltrúar slökkviliðsmanna sýndu á fundi með ríkissáttasamjara í gær. 

„Það er von launanefndar sveitarfélaga að þessi skoðun flýti samningaferlinu svo öryggi almennings verði ekki ógnað og ferðafólk verði ekki fyrir frekari óþægindum vegna verkfallsaðgerða Landssambands slökkviliðs- og sjúkraflutningamanna," segir í tilkynningu launanefndarinnar.

16 tíma langt verkfall slökkviliðsmanna hófst klukkan 8 í morgun. Það hefur meðal annars þau áhrif, að Akureyrarflugvöllur lokast fyrir innanlandsflugi Flugfélags Íslands. Flugfélagið ætlar að fljúga til Húsavíkur í staðinn nú síðdegis en slökkviliðsmenn líta á það sem verkfallsbrot.