HS Orka mbl.is/Brynjar Gauti

Egill Ólafsson egol@mbl.is

Stjórnendur HS Orku vonast eftir að í september afgreiði Orkustofnun virkjanaleyfi vegna stækkunar Reykjanesvirkjunar. Leyfið er forsenda þess að hægt sé að ljúka fjármögnun virkjunarinnar og gerð raforkusamnings.

Júlíus Jónsson, forstjóri HS Orku, segir að skapist óvissa um eignarhald á HS Orku sé hætt við að ekki verði hægt að ganga frá fjármögnun framkvæmdarinnar. 50 MW gufuhverfill og tilheyrandi búnaður vegna stækkunar virkjunarinnar kom til landsins í byrjun júní.

Búast má við að bora þurfi 7-8 holur til að fá næga orku til að knýja hverfilinn. Orkustofnun vill ekki gefa út virkjanaleyfi fyrr en fyrir liggja betri upplýsingar um hvort svæðið þolir meiri nýtingu. Holunni verður „hleypt upp“ sem kallað er í byrjun september og þá fást betri upplýsingar um hvort hægt sé að virkja meira á svæðinu. Sérfræðingar eru ekki sammála um hvort svæðið stendur undir einni vél til viðbótar.

Júlíus segir að leyfið sé forsenda fyrir því að hægt sé að ljúka fjármögnun og gerð orkusölusamnings. Hann segir að óvissa um eignarhaldið á HS Orku hafi neikvæð áhrif á þessa framkvæmd. „Þessi óvissa tefur klárlega fjármögnun framkvæmda. Það er mjög hæpið að fara í stóra lántöku eða hlutafjáraukningu í svona óvissu.“

Magma kom með 2,5 milljarða í nýtt hlutafé í HS Orku í mars sl. en það fjármagn var notað í að borga túrbínu og búnað henni tengdan og holur sem búið er að bora. „Það er allt greitt sem búið er að gera. Þetta eru talsverð tíðindi því þetta er í fyrsta skipti sem orkufyrirtæki á Íslandi fær nýtt hlutafé. Allar framkvæmdir hér á árum áður hjá Landsvirkjun, Orkuveitu Reykjavíkur og Hitaveitu Suðurnesja voru fjármagnaðar með lánum og jafnvel arðgreiðslur líka,“ segir Júlíus.

Júlíus viðurkennir að HS Orka sé að taka áhættu með því að kaupa túrbínu án þess að hafa fengið virkjanaleyfi. Þetta sé hins vegar alvanalegt verklag.