„Yfirvinnubann felst í að menn sinna ekki þeim störfum sem eru að öllu jöfnu unnin í yfirvinnu s.s. utanbæjarflutningum og fylgd við sprengjuefnaflutninga og svo ýmislegt annað smávægilegt, aðstoð við einstaklinga og vakt við kvikmyndatökur, svo dæmi sé nefnt,“ segir Jón Viðar Matthíasson, slökkviliðsstjóri höfuðborgarsvæðisins.

Ef ekki semst milli Launanefndar sveitarfélaga og Landssambands slökkviliðs- og sjúkraflutningamanna mun yfirvinnubann taka gildi í fyrramálið og standa yfir uns leysist úr deilunni.

Samhliða því mun 16 klukkustunda verkfall standa yfir á morgun.

Jón Viðar segir utanbæjarflutninga vera talsverðan hluta af starfsemi slökkviliðsins. „Sjúklingar utan svæðisins eru fluttir til rannsókna eða aðgerða inn á Landspítalann og að því loknu er viðkomandi sjúklingur fluttur aftur á sitt heimasjúkrahús, en slíka flutninga verður erfitt að manna í yfirvinnubanni.“

Þó segir Jón alveg öruggt að flutningur sjúklings af Landspítalanum í sjúkraflug, t.d. vegna hjartaaðgerðar í útlöndum, flokkist sem neyðartilvik og slíkum tilfellum verði ávallt sinnt.

„Samkvæmt lögum um kjarasamninga opinberra starfsmanna, get ég kallað inn menn sem eru í verkfalli til að afstýra neyðarástandi. Utanbæjarflutningur verður þó seint flokkaður sem neyðarflutningur en það gæti orðið slæmt fyrir sjúkrahúsin ef sjúklingar fara að safnast upp inni á þeim.“