Fischer ekki faðir stúlkunnar
Bobby Fischer. mbl.is/Sverrir
Niðurstaða DNA rannsóknar á lífssýnum úr Bobby Fischer og filippseyskrar stúlku er að Fischer sé ekki faðir stúlkunnar. Þetta hefur mbl.is fengið staðfest hjá lögfræðingi systursona Fischer. Því hefur barnfaðernismálið verið fellt niður en enn er deilt um hver eigi að erfa Fischer, systursynir hans eða meint eiginkona Fischers, Myoko Watai.
Guðjón Ólafur Jónsson, lögmaður systursona Fischers staðfestir við mbl.is að réttarmeinadeild Landspítalans hafi sent lögmönnum sem koma að málinu þann úrskurð sinn að Jinky Young geti ekki verið dóttir Fischers.
Marilyn Young, sem býr á Filippseyjum, hélt því fram að hún hafi eignast barn með Ficher árið 2001. Hæstiréttur féllst á kröfu hennar um að tekið yrði lífsýni úr Fischer til að fá úr því skorið hvort þetta væri rétt.
Fram hefur komið að Jinky heimsótti Fischer eftir að hann kom til Íslands. Meðal gagna, sem lögð voru fyrir dómstóla á
Íslandi, var mynd af Young, Jinky og Fisher uppi í rúmi árið 2004 og
póstkort til Jinky frá Fischer en á kortið er skrifað „Daddy“.
Deilur um hver sé lögmætur erfingi Fischer eru enn til meðferðar í Héraðsdómi Reykjavíkur og verður næst réttað í málinu í næsta mánuði.
Í desember í fyrra felldi Hæstiréttur úr gildi úrskurð Héraðsdóms Reykjavíkur um að ekki þyrfti að fara fram opinber skipti á dánarbúi Fischer. Féllst Hæstiréttur þar með á kröfu systursona Fischer um að opinber skipti fari fram og er niðurstaða Hæstaréttar byggð á því að ekki hafi verið lögð fram fullnægjandi sönnun um að Fischer og Myoko Watai hafi gengið í hjónaband.
Í dómi Hæstaréttar kom fram að lagt hafi verið fram skjal með yfirskriftina hjónavígsluvottorð á ensku og í íslenskri þýðingu. Á því segi að það sé byggt á staðfestu afriti opinberrar fjölskylduskrifstofu. Skorað hafi verið á Watai að leggja fram gögn sem hafi verið grundvöllur skráningarinnar. Hún hafi ekki orðið við því og ekki heldur skýrt með fullnægjandi hætti hvað standi því í vegi. Var því lagt til grundvallar í málinu að ekki hafi verið lögð fram fullnægjandi sönnun um að þau hafi gengið í hjónaband.
