Norska blaðið Fiskaren fjallaði á föstudag um makríldeilur Íslendinga og Færeyinga við Evrópusambandið og Noreg. Þar var m.a. sagt að niðurstöður rannsóknarleiðangurs Norðmanna gæfu til kynna að makríll í Norðurhöfum væri nú dreifðari en áður og minna af honum í grennd við Ísland en í fyrra. Íslendingar ættu í erfiðleikum með að fiska upp í kvótann sem þeir hefðu ákveðið sjálfir, þ.e. 130 þúsund tonn.

Sagt er í grein blaðsins að Fiskistofa hafi ekki tölur um það hve mikill hluti aflans hafi farið í lýsi og mjöl og hve mikið til manneldis en áður hafi nær allur aflinn farið í lýsi og mjöl. „Íslensku skipin stunda aðallega makrílveiðarnar með tvíburatrolli. Með þessari aðferð er ekki lögð áhersla á eina tegund fram yfir aðra heldur fer allur fiskur á milli skipanna tveggja sem deila trollinu í veiðarfærið,“ segir blaðið.

Vitnað er í Leif Nøttestad, sérfræðing í makrílveiðum hjá norsku hafrannsóknastofnuninni. Nøttestad segir að venjulega sé um að ræða mikinn meðafla þegar veitt sé í troll með þessum hætti, auk makríls sé um að ræða síld, kolmunna og lax.

Audun Maråk, forstjóri samtaka útgerðarmanna í sjávarútvegi, segir að ekki sé þá eingöngu verið að stunda ólöglegar veiðar á makríl heldur einnig síld. „Því meiri makríl sem landað er sem síld þeim mun meiri síld geta Íslendingar þá veitt á sínum eigin svæðum.

Eiga rétt á makrílkvóta  

Leif Nøttestad segir ljóst að Íslendingar eigi nú rétt á makrílkvóta en þeir fari fram á allt of mikið, vilji 20% af heildaraflanum en ættu að fá 5%.

Blaðið segir að ESB sé á hverju ári boðið að taka þátt í norskum leiðangri til að kanna ástand makrílsins. Sambandið hafni ávallt, líklega af því að niðurstaðan styrki kvótakröfur norrænu þjóðanna.