Slasaður maður var látinn bíða alla nóttina

Karlmaður sem féll milli skipa við höfnina í Grímsey á mánudagskvöld þurfti að bíða í 9 klukkustundir áður en hann komst undir læknishendur, að því er fram kemur í Morgunblaðinu í dag.

Vegna þoku var ekki hægt að fljúga til Grímseyjar nema með þyrlu Landhelgisgæslunnar. Læknir á Akureyri var í stöðugu símasambandi við eiginkonu hins slasaða en enginn læknir hefur aðsetur í Grímsey að staðaldri.

Vegna niðurskurðar hjá Landhelgisgæslunni tekst aðeins að manna eina áhöfn á hverri vakt. Tvö útköll bárust samtímis að kvöldi mánudagsins og því þurfti læknir að meta í gegnum síma hvort útkallanna mætti bíða. Samkvæmt upplýsingum frá Landhelgisgæslunni var ekki nægur mannskapur til að bregðast við báðum útköllunum samtímis en Gæslan hefur afnot af tveimur þyrlum.