Héraðsdómur Norðurlands eystra. mbl.is/Skapti

Héraðsdómur  Norðurlands eystra hefur dæmt karlmann á sextugsaldri í 18 mánaða fangelsi fyrir nauðgun. Þá var maðurinn dæmdur til að greiða konunni, sem hann nauðgaði, 800 þúsund krónur í bætur.

Fram kemur í dómnum að þetta gerðist í janúar á þessu ári. Maðurinn og konan bjuggu í sama húsi ásamt systur konunnar.  Umrætt kvöld var áfengi haft um hönd og sofnaði önnur konan í sófa í stofu.

Systir konunnar kom síðar að systur sinni og manninum og fullyrti fyrir rétti að maðurinn hefði verið að hafa samfarir við konuna, sem var sofandi. Maðurinn fullyrti að hann hefði aðeins verið að breiða yfir konuna í sófanum.

Í niðurstöðu dómsins segir, að eindreginn framburður systurinnar fái stoð af ýmsum atriðum, sem eru rakin. Var sá framburður því lagður til grundvallar um að maðurinn hefði haft samfarir við konuna og að hún hafi verið sofandi og ölvuð og ekki getað spornað við verknaðinum af þeim sökum.

Í dómnum kemur einnig fram, að konan sem brotið var á, hafi átt við  þunglyndi að stríða, en verið á batavegi þegar braut á henni. Er vísað til álits læknis um að árásin hafi stöðvað batann og valdið áfallastreituröskun og verulegri vanlíðan, sem enn sé til staðar.