Viðrar vel fyrir flugeldasýningu
Flugeldasýningin ætti að sjást vel á laugardagskvöldið mbl.is/Júlíus Sigurjónsson
Ágæt veðurspá er fyrir höfuðborgarsvæðið um helgina og því góðar líkur á því að flugeldasýningin á laugardagskvöldið sjáist víða. Það ætti því að viðra vel fyrir þá sem ætla að taka þátt í atburðum á Menningarnótt og í Reykjavíkurmaraþoni á laugardag.
Samkvæmt upplýsingum frá Einari Sveinbjörnssyni veðurfræðingi virðist hann vera lagstur í norðaustan og síðar norðanátt næstu daga. Nokkuð myndarleg lægð verður á ferðinni við Írland og Skotland á sama tíma og Grænlandshæðin hefur náð að hreiðra um sig. Með þessu fer veður heldur kólnandi á landinu. Veðrið verður einna skást og reyndar alveg ágætt suðvestanlands þessa helgina.
Föstudagur 20. ágúst:
Meira og minna skýjað á landinu, einna helst að það sjáist til sólar á Vesturlandi. Norðaustan- og austanlands er spáð þokusudda og eins vestur með norðurströndinni og á Ströndum. Annars staðar að mestu þurrt. Þó má gera ráð fyrir rigningu um tíma undir kvöld á Suður- og Suðvesturlandi. Veður fer kólnandi, einkum norðan- og austantil. Aðfararnótt laugardagsins gæti hæglega gránað í fjöll norðaustanlands. Með þessu verður víða strekkingsvindur, einkum á Vestfjörðum og við Breiðafjörð, þar allt að 13-15 m/s
Laugardagur 21. ágúst:
Svipað veður á landinu, en heldur bjartara þó sunnan- og suðvestanlands. Á móti kemur að heldur verður blautara norðan- og austantil, þar sem gert er ráð fyrir þungbúnu veðri og hita 7 til 10 stig. Sunnan til verður skýjað með köflum og sums staðar skúrir síðdegis. Áfram N- og NA-átt á landinu, víða þetta 5-10 m/s. Reykjavík býr svo vel að þar veitir Esjan skjól fyrir NA-áttinni og því er spáð þar hægum vindi, nokkuð björtu veðri og hita fyrir vikið 14 til 16 stig yfir miðjan daginn, en 8 til 10 stig eftir að dimma tekur.
Sunnudagur 22. ágúst:
Spáð er eindreginni N-átt á landinu, víða 8-13 m/s. Úrkomusvæði kemur upp að Norður- og Austurlandi og þar verður meira og minna samfelld rigning, þ.e. frá norðanverðum Vestfjörðum, austur um á firði. Sunnanlands og vestan verður hins vegar þurrt og sums staðar bjartviðri. Fremur svalt í veðri, en hiti þó allt að 14 til 17 stig þar sem best lætur sunnan- og suðvestanlands.
