Morðið á Hannesi Þór Helgasyni er flóknara og með dýpri rætur en flest undangengin morð hér á landi. Hannes var myrtur með eggvopni á heimili sínu, síðustu helgi. Enginn grunaður einstaklingur er í haldi lögreglunnar að svo stöddu, en á fjórða tug manns hafi verið yfirheyrð vegna málsins nú þegar.

Þetta kom fram á blaðamannafundi lögreglunnar fyrr í dag. Friðrik Smári Björgvinsson, yfirlögregluþjónn rannsóknardeildar og Björgvin Björgvinsson, aðstoðaryfirlögregluþjónn, fóru yfir stöðu rannsóknarinnar á fundinum.

Lögreglan áréttar að morðið beri ekki þess merki að hinum almenna borgara stafi hætta af morðingjanum, þó erfitt sé að fullyrða um slíkt. Lögreglan telur ekki líklegt að tilviljun hafi ráðið því að morðinginn hafi ákveðið að fara inn í hús Hannesar.

Á fjórða tug starfsmanna lögreglunnar vinna nú að rannsókn málsins. Fjölmargir utan lögreglunnar hafa þegar lagt lögreglunni lið með ýmsum upplýsingum sem tengjast morðinu. Lögreglan óskar enn eftir aðstoð og biður fólk að hringja í síma 444-1104, hafi þær einhverjar upplýsingar sem kunna að hjálpa til við rannsóknina.