Segja hringinn þrengjast
Lögreglumennirnir Björgvin Björgvinsson og Friðrik Smári Björgvinsson sátu fyrir svörum á blaðamannafundinum. mbl.is/Júlíus
Eggvopnið, sem notað var til að ráða Hannesi Þór Helgasyni bana í húsi hans aðfaranótt sunnudag, fannst ekki á vettvangi og hefur ekki fundist þrátt fyrir leit lögreglu. Vopnið var oddhvasst og blað þess talið vera 2 sentimetrar á breidd. Líklega er um að ræða hníf sem er 15-20 sentimetrar á lengd.
Þetta kom fram á blaðamannafundi, sem lögreglan á höfuðborgarsvæðinu hélt í dag um málið. Friðrik Smári Björgvinsson og Björgvin Björgvinsson hjá rannsóknardeild lögreglunnar á höfuðborgarsvæðinu upplýstu blaðamenn um framvindu rannsóknar á morðinu í Hafnarfirði sl. sunnudag. Í máli þeirra kom fram að áverkar á höndum Hannesar hafi bent til átaka.
Rannsókn lögreglu hefur ekki leitt til þess að neinn sé í haldi grunaður um verknaðinn. Þá tók Friðrik Smári fram að það eitt að grunuðum mönnum sé sleppt þýði ekki að rannsóknin færist aftur á byrjunarreit, þvert á móti þrengist hringurinn í hvert sinn. Friðrik kvað rannsókn lögreglu fara þannig fram að allir séu útilokaðir þar til hin seki stendur einn eftir.
Lögreglan kveðst hafa rætt við hátt í fjórða tug manna vegna málsins. Flestir hafi komið á fund á lögreglustöð, sumir hafi rætt við lögreglu utan stöðvar en tveirvoru handteknir og færðir til yfirheyrslu.
Þá sagði lögreglan að þrátt fyrir að tveimur hafi verið sleppt úr haldi séu aðrir grunaðir í málinu.
Tæknirannsókn lögreglu er að ljúka. Lífsýna var aflað á vettvangi og hafa þau verið send til greiningar.
Í svörum lögreglu við spurningum blaðamanna kom fram að morðið á Hannesi væri ekki hefðbundið og rannsókn þess því viðamikil. Lögreglan játaði því að rannsókn væri nú einnig beint utan landsteina vegna þess að Hannes Þór átti í viðskiptum í útlöndum.
Lögreglan áréttar að morðið beri ekki þess merki að hinum almenna borgara stafi hætta af morðingjanum, þó erfitt sé að fullyrða um slíkt. Lögreglan telur ekki líklegt að tilviljun hafi ráðið því að morðinginn hafi ákveðið að fara inn í hús Hannesar.
Hannes Þór Helgason var myrtur á heimili sínu á sunnudag
