NBI hafði betur en þrotabú Fons
Hæstiréttur hefur snúið við úrskurði héraðsdóms í máli NBI gegn þrotabúi Fons. Er í dómi Hæstaréttar fallist á veðrétt NBI í hlutafé Fons í Securitas upp á 149,9 milljónir króna. Taldi þrotabúið að annmarkar á formi stjórnar Securitas hafi valdið því að ekki hafi stofnast gilt handveð í hlutafénu. Á það féllst Hæstiréttur ekki.
Hópur fjárfesta undir forystu Guðmundar Arasonar, fyrrverandi forstjóra Securitas keypti í apríl sl. allt hlutafé í Securitas af þrotabúi Fons.
Héraðsdómur Reykjavíkur hafnaði í júní var kröfu NBI, (Nýja Landsbankans) um viðurkenningu veðréttar í eignarhlut þrotabús Fons, sem áður var í eigu Pálma Haraldssonar, í Securitas að nafnverði 149,9 milljónir króna.
NIB með kröfur upp á 4,8 milljarða króna í þrotabú Fons
Fons hf. var í umfangsmiklum viðskiptum við NIB og forvera hans, Landsbanka Íslands hf. Sem tryggingu fyrir lánum félagsins gaf félagið út ýmsa veðsamninga og handveðsyfirlýsingar, tryggðar með veði í ýmsum eignum félagsins. Þar á meðal gaf Fons hf. út handveðsyfirlýsingu 19. mars 2008, þar sem Landsbanka Íslands, síðar NIB, voru settir að veði heildareignarhlutur í Sikker ehf., sem var eignarhaldsfélag í eigu Fons hf. og var eigandi að 99,93% í Securitas hf. Um var að ræða hlutabréf að nafnverði 149,9 milljónir króna.
Í tengslum við veðsetninguna voru hlutabréf Securitas hf. undirrituð og gefin út af stjórn félagsins. Annars vegar bréf nr. 1 að fjárhæð 149.900.000 krónur, útgefið af Fons hf. og hins vegar nr. 2, bréf að fjárhæð 100.000 krónur, útgefið til Pálma Haraldssonar. Samhliða undirritun handveðsyfirlýsingarinnar afhenti Fons NBI frumrit hlutabréfs nr. 1 til vörslu.
Kveðinn var upp úrskurður um gjaldþrotaskipti á búi Fons hf., 30. apríl 2009. NBI lýsti kröfum í þrotabú Fons hf. og nema kröfur hans alls 4.785.642.377 krónum.
NBI taldi sig njóta veðréttar í eignarhluta þrotabúsins í Securitas hf. og byggði á handveðinu frá 29. október 2008. Skiptastjóri hafnaði veðkröfu NBI á þeim grundvelli að fullnægjandi gögn vantaði um að veðsetning hlutabréfa í Securitas hf. væri gild og hefði öðlast réttarvernd.
Bankinn sendi skiptastjóra viðbótargögn, meðal annars yfirlýsingu fjögurra af fimm stjórnarmönnum sem sátu í stjórn Securitas hf., þegar veðsamningur var gerður 29. október 2008, en með yfirlýsingunni staðfesta þeir að þeim hafi verið kunnugt um veðsetninguna og að þeir hafi ekki verið henni mótfallnir. Skiptastjóri taldi að enn hefði ekki verið sýnt fram á að til gildrar veðsetningar hefði stofnast í hlutum þrotabúsins í Securitas hf. Því boðaði skiptastjóri til skiptafundar en ekki tókst að jafna ágreininginn á skiptafundinum og því kom málið til kasta dómstóla.
Í úrskurði hérasdómara í júní kom fram að í ljósi þess hversu nátengdar stjórnir félaganna Securitas hf. og Fons hf. voru, er það engu að síður ljóst að veðsetning hlutafjár í Securitas hf. til handa sóknaraðila var andstæð hlutafélagalögum og samþykktum félagsins. Þrotabúi Fons var því heimilt að selja öll hlutabréf fyrirtækisins, þrátt fyrir að þau hafi verið veðsett Landsbankanum, samkvæmt niðurstöðu héraðsdóms en í Hæstarétti var þessari niðurstöðu snúið við líkt og áður sagði.
