Boeing 787 Dreamliner þotan á Keflavíkurflugvelli í morgun. Ljósmynd/Bergsveinn Norðdahl

Nýja Dreamliner þotan, Boeing 787 lenti á Keflavíkurflugvelli í morgun en hún er hingað komin til prófana í hliðarvindi. Að sögn Friðþórs Eydal, upplýsingafulltrúa flugvallarins, er fyrst og fremst um lendingaræfingar að ræða en Keflavíkurflugvöllur er þekktur fyrir sterka vinda.

„Ísland er inni á lægðabraut sem þýðir að það er sífellt að breytast vindáttin,“ segir Friðþór.  „Flugvellir erlendis eru venjulega bara með einni eða tveimur samsíða brautum sem liggja i sömu átt því vindar eru stöðugir á sömu áttinni, en hér eru bæði fjölbreyttari áttir og oft á tíðum verulegur vindur. Vegna þessara aðstæðna var Keflavíkurflugvöllur, eins og Reykjavíkurflugvöllur, lagður þannig að það eru nokkrar brautir sem skarast. Þetta þýðir að hann er mjög hentugur í þessu sambandi því þá er hægt að æfa á annarri brautinni þar sem vindurinn stendur þvert á, á meðan hin brautin er í notkun og þar má þá lenda ef á þarf að halda. Það eru þessar aðstæður sem menn sækjast eftir."

Þetta er því ekki í fyrsta skipti sem nýjar vélar koma hingað til æfinga. Í hitteðfyrra kom t.d. nýjasta risaflugvélin frá Airbus, A-380, fjórum sinnum hingað til æfinga. Dreamliner 787 þotunnar hefur verið beðið með mikillar eftirvæntingu en framleiðslu hennar hefur nokkrum sinnum verið frestað. Um er að ræða fyrstu nýju þotu Boeing í meira en áratug.

Dreamliner þotan verður allt að viku hér við æfingar og bendir Friðþór á að flugáhugamenn geti fylgst með lendingaræfingunum utan flugvallarsvæðisins, auk þess sem fjölmiðlum verður boðið á sérstaka kynningu á vélinni.