Gríðarleg eyðilegging blasir við í miðborg Christchurch Ljósmynd Hjörtur Arason

Hjörtur Arason sem býr í borginni Christchurch, annarri stærstu borg Nýja-Sjálands, segir að eyðilegging blasi víða við í miðborginni. Hann og eiginkona hans, Hera Hjartardóttir, sluppu ómeidd og eins foreldrar Heru og bróðir sem einnig búa á svæðinu.

Að sögn Hjartar eru það einkum gömul hús sem hafa hrunið eins og spilaborgir en nýrri hús virðast hafa staðið af sér skjálftann sem mældist 7,2 stig. Hann segir að sírenuvæl heyrist úr öllum áttum og sjúkrabifreiðar út um allt en mbl.is náði sambandi við Hjört er hann var á ferð um miðborg Christchurch að kanna aðstæður. Ekki hafa borist fregnir af slysum á fólki eða dauðsföllum enn sem komið er. Þar sem allt rafmagn fór af borginni er erfitt að gera sér grein fyrir ástandinu þar sem skjálftinn reið yfir um fimmleytið að nóttu til á staðartíma og myrkur. Eins er allt vatnslaust.

Hjörtur segir að einhverjir munir hafi eyðilagst á heimili hans og Heru og innbúið allt út um allt en þau búa í um fimm mínútna fjarlægð frá miðborg Christchurch.

Hjörtur hefur búið um nokkurra ára skeið á Nýja-Sjálandi og starfar sem smiður þar. Hera, eiginkona hans sem er tónlistarmaður, hefur hins vegar búið lengi á Nýja-Sjálandi ásamt foreldrum og bróður.