Ari Edwald, forstjóri 365 miðla. Ómar Óskarsson

Ari Edwald, forstjóri 365-miðla, segir efnistök fréttastofu Stöðvar 2 munu verða með svipuðu sniði og verið hefur en greint var frá því í dag að Freyr Einarsson yrði ritstjóri fréttastofunnar og Vísis.is. Freyr hefur verið bráðabirgðafréttastjóri síðan Óskar Hrafn Þorvaldsson lét af störfum í maí.

Frey við hlið var Kristján Már Unnarsson fréttamaður sem gegndi stöðu varafréttastjóra og verður sá síðarnefndi nú fréttastjóri stöðvarinnar.

Gunnar Reynir Valþórsson verður hins vegar fréttastjóri Vísis.

Aðspurður hvort breytingarnar eigi sér langan aðdraganda svarar Ari því til að þær séu liður í stöðugri þróun.

„Þetta hefur verið að mótast, bæði samstarf miðlanna og skipulagið á stjórnuninni. Okkur sýnist að það sé skynsamlegast að setja þetta með svipuðum hætti ljósvakamegin eins og í blaðaútgáfunni, að hafa ritstjóra yfir sviðinu og svo fréttastjóra undir honum, sem reka annars vegar fréttastofu Stöðvar 2 og fréttastofu Vísis.is.

Svo er verið að festa í sessi stöðu framleiðslustjóra Stöðvar 2-megin, þar sem fer Eva Georgsdóttir, og stöðu vefstjóra Vísis.is sem verður Tinni Sveinsson.

Þetta er fyrirkomulag sem hefur verið að þróast eftir síðustu breytingar. Við höfum leyft reynslunni að móta það svolítið.“

Ari segir að á næstu vikum muni lesendur vefjarsins Visir.is taka eftir frekari breytingum á útliti hans, auk þess sem haldið verði áfram að breyta útliti Fréttablaðsins.

Hann segir fréttastofu Stöðvar 2 hafa „sótt gríðarlega í sig veðrið með þeim áherslubreytingum sem hafi verið farið í gegnum síðustu misseri“.

„Það hefur tekist að lækka framleiðslukostnað og komið í ljós að breytingar í efnistökum hafa átt vinsældum að fagna. Því áhorfið er nú fast að því tvöfalt miðað við það sem það var fyrir tveimur árum. Stöð 2 og Vísir.is hafa verið að sækja í sig veðrið jafnt og þétt og við erum að sjálfsögðu að hugsa þetta þannig að breytingarnar styðji við þá þróun.“

- Megum við eiga von á öðruvísi efnistökum?

„Nei, ekki á fréttastofu Stöðvar 2 geri ég ráð fyrir. Þarna eru sömu yfirmenn og hafa verið,“ segir Ari.