Bíllinn kastaðist fram af Kringlumýrarbraut niður á Nýbýlaveg. mbl.is/Júlíus

Mennirnir tveir sem lagðir voru inn á gjörgæsludeild Landspítalans eftir alvarlegt bílslys aðfaranótt föstudags eru lausir úr öndunarvél og á batavegi að sögn vakthafandi læknis á deildinni. Vonast hann til að útskrifa megi þá af gjörgæslu síðar í dag.

Tildrög slyssins voru þau að ökumaður sem var á leið suður Hafnarfjarðarveg með fjóra farþega missti stjórn á bílnum í Fossvogi. Ók hann upp á vegrið sem skilur akreinarnar að og hentist bíllinn fram af brúnni niður á Nýbýlaveg þar sem hann valt niður grasbrekku og staðnæmdist upp á rönd í vegkantinum.

Þrír þeirra sem voru í bílnum þurfti ekki að leggja inn á gjörgæslu. Að sögn lögreglu var aðkoman mjög ljót og þurfti að kalla út tækjabíll slökkviliðs og klippa bílinn í sundur til að ná fólkinu út.

Málið er í rannsókn hjá lögreglu. Rannsóknin lýtur m.a. að því hvort ofsaakstur ökumanns hafi valdið slysinu, samkvæmt tilkynningu frá lögreglunni í gær.