Í Hlíðarétt mbl.is

Réttir fóru fram í Hlíðarétt í Mývatnssveit í dag og hefur einmuna veðurblíða verið á svæðinu það sem af er degi. Verið er að ljúka sundurdrætti og að sögn Birkis Fanndals á Sólgörðum hefur þetta verið frábær réttadagur. 

„Féð  lítur vel út, mjög fallegt. Það er þurrt og þrifalegt vegna sunnangolunnar og það er vænt,“ segir Birkir og kveður mikinn fjölda fólks hafa tekið þátt í réttinni: „Ég hef aldrei séð svona margt fólk í réttinni. En það er náttúrulega úrelt að segja það því það fjölgar ár frá ári. Það eru nokkur hundruð manns, þetta er virkilega skemmtilegt.“

Rekstur fjárins vestur yfir Námsakarð hófst í morgun klukkan sjö og innan við en tvær klukkustundir tók að koma fénu til réttar. Sundurdráttur hófst um 09:30.

Segir Birkir að fólk hafi gefið sér góðan tíma í réttinni og notið þess að eyða tíma með fólkinu sem saman var komið, veitinga sem slysavarnardeildin Hringurinn bauð upp á, sem og veðurblíðunnar. Hyggur Birkir að hitinn hafi náð um tuttugu gráðum. 

Hlíðarétt stendur í lægð forns hranárfarvegs og var hlaðin árið 1880. Áhorfendur standa því hærra en réttin og hafa góða yfirsýn til að fylgjast með öllu sem gerist í almenningnum.

Í Námaskarði mbl.is