Kúabændur gagnrýna könnun MMR. Reuters

„Spurningin sem lögð er upp í könnuninni, hversu fylgjandi eða andvígur ertu því að mjólkursamlög sem fari fram yfir greiðslumark séu beitt fjársektum, er tóm vitleysa,“ segir Baldur Helgi Benjamínsson, framkvæmdastóri Landssambands kúabænda, um könnun MMR á afstöðu landsmanna til sektanna.

Eins og komið hefur fram kvaðst yfirgnæfandi meirihluta aðspurðra andvígur slíkum fjársektum. Baldur Helgi telur könnunina á misskilningi byggða. 

„Það að taka við mjólk umfram greiðslumark er ekki og verður aldrei lögbrot. Ef hins vegar tekið er á móti mjólk umfram greiðslumark og afurðir úr henni markaðsfærðar á innanlandsmarkaði er það ólöglegt. Það hefur verið óheimilt samkvæmt lögum í um aldarfjórðung eða allt frá því að búvörulög tóku gildi 1985. Spurningin er sem sagt tóm vitleysa.

Mjólkursamlög hafa í gegnum tíðina tekið á móti umframmjólk og flutt hana úr landi. Mjólkursamsalan og KS gera það og þau samlög sem hafa verið við lýði hér undanfarna áratugi. Þannig að það að taka á móti umframmjólk verður ekki lögbrot. Það held ég að sé grundvallaratriði sem ber að ítreka af gefnu tilefni.“

Hver sem er getur sett upp mjólkurvinnslu 

- Hvað með þá gagnrýni sem lögð var fram nýverið að þetta fyrirkomulag komi í veg fyrir samkeppni á markaði?

„Þetta kemur ekki í veg fyrir samkeppni í vinnslunni vegna þess að hver sem er getur sett upp mjólkurvinnslu á morgun og samið við kaupanda að mjólkinni eða þá til dæmis keypt mjólk af Mjólkursamsölunni. Vífilfell til dæmis gerir það. Þeir framleiða kókómjólk og kaupa í hana mjólkina frá MS sem er skyldug til að selja hana á verði sem verðlagsnefnd um búvörur ákveður. Þannig að þessi gagnrýni er einfaldlega óréttmæt. Þetta snýr fyrst og fremst að bændunum.

Með því að kaupa greiðslumark er verið að kaupa aðgang að markaði. Ef það er að engu haft er það kerfi auðvitað í algeru uppnámi. Það er hverjum sem er frjálst að vinna afurðir úr mjólk. Það eru nokkur dæmi um að fyrirtæki nýti sér þessa heimild, það er að segja að mjólkuriðnaðurinn sé skyldugur til að láta þeim mjólk í té á fyrirframákveðnu verði. Þannig að gagnrýni á þetta frumvarp hefur að miklu leyti byggst á tómum misskilningi,“ segir Baldur Helgi.