Lífeyrissjóður verzlunarmanna er í Húsi verslunarinnar.

Stjórn VR felldi í kvöld tillögu frá Bjarka Steingrímssyni um vantraust á Ragnar Önundarson sem fulltrúa félagsins í stjórn Lífeyrissjóðs verzlunarmanna.

Í yfirlýsingu frá stjórn VR segir, að þessi afstaða Bjarka hafi lengi legið fyrir. Sé það mat stjórnarinnar, að ekkert nýtt hafi komið fram sem kalli á endurskoðun á stöðu Ragnars hjá lífeyrissjóðnum. 

Þá sendi Kristinn Örn Jóhannesson, formaður VR, frá sér yfirlýsingu þar sem áréttað er að Ragnar njóti  fyllsta trausts í mikilvægum trúnaðarstörfum sínum fyrir félagsmenn VR hjá Lífeyrissjóði verzlunarmanna. Ragnar hafi verið síðast endurtilnefndur sem varaformaður stjórnar sjóðsins í febrúar á þessu ári. Ekkert hafi komið fram í millitíðinni sem gefi ástæðu til að endurskoða þessa skipun.

Bjarki vísaði meðal annars til þess í vantrauststillögu sinni, að Ragnar hafi gegnt stöðu framkvæmdastjóra Kreditkorta þegar fyrirtækinu var gert að greiða 185 milljónir króna í stjórnvaldssekt, vegna þátttöku þess í samkeppnishamlandi brotum á markaði.

Kristinn Örn segir, að það hafi margsinnis komið fram, að Ragnar hafi ekki verið beinn málsaðili í þeirri sátt, heldur voru það stjórnir kortafyrirtækjanna sem voru í eign bankanna sem játuðu á sig lögbrot og gerðu sátt. Aðkoma Ragnars að Kreditkortum geri hann ekki vanhæfan sem fulltrúa VR í stjórn Lífeyrissjóðs verzlunarmanna.

Vefur VR