Stúdentaráð Háskóla Íslands segir, að fyrir liggi að niðurskurður á fjárframlögum til skólans á næsta ári verði að lágmarki 7,5% en það svari til 673 milljóna króna. Það svari til reksturs læknadeildar skólans í eitt ár og reksturs sálfræðideildar HÍ í rúmlega fjögur ár. 

Þetta kemur fram í skýrslu, sem Stúdentaráð hefur gert.  Segir þar ljóst, að niðurskurður menntamálayfirvalda á fjárveitingum til menntakerfisins hafi nú þegar haft töluverð áhrif innan Háskóla Íslands, og birtist það til dæmis í sameiningu og fækkun námskeiða og gjaldtöku fyrir upptökupróf. Enn fremur hafi háskólinn ákveðið að taka ekki við nýnemum í haust í þrjár námsleiðir, fornleifafræði, ritlist og rússnesku.

Hugsanlegt sé að í náinni framtíð verði skrásetningargjöld hækkuð, gjaldtöku fyrir nýskráningu nýnema og sérstöku tryggingargjaldi  komið á, enn frekari samþætting kennslu eigi sér stað og nemendum verði fjölgað á hvern starfandi kennara.

„Ef þessi þróun heldur áfram líkt og á horfir án inngrips stjórnvalda munu gæði menntunar rýrna sem og jafnrétti til náms heyra sögunni til Orðspor Háskóla Íslands sem virt menntastofnun mun laskast verulega," segir í skýrslunni.

Þar segir einnig, að  Háskóli Íslands sé stofnun sem verði að verja fyrir niðurskurði með öllum tiltækum ráðum. Á sama tíma og sömu fjárhæðir séu greiddar úr ríkiskassanum fyrir nemendur í einkaskólum jafnt sem ríkisreknum skólum hljóti eðlileg forgangsröðun að hafa bjagast verulega.

„Þetta er jafnframt ólíkt því sem tíðkast á Norðurlöndunum þar sem dregið er úr framlögum til einkarekinna skóla sem nemur skólagjöldunum sem stúdentum er gert að greiða. Taka verður fullt tillit til mismunandi rekstrarforms menntastofnana ríkisins og þar með ábyrgð einkarekinna skóla á sínum eigin rekstraröryggi. Á tímum sem þessum er jafnframt vert að spyrja hvort þörf sé á sjö háskólum í rúmlega 300 þúsund manna samfélagi," segir í skýrslunni.

Skýrslan í heild