Hákon Hákonarson, formaður stjórnar Íbúðalánasjóðs, á ekki von á því að gengið verði frá ráðningu nýs framkvæmdastjóra sjóðsins í dag en stjórnarfundur stendur yfir. Hins vegar er ráðning framkvæmdastjóra rædd á fundinum.

Ásta H. Bragadóttir, starfandi framkvæmdastjóri Íbúðalánasjóðs og einn umsækjenda um stöðu framkvæmdastjóra, dró umsókn sína til baka eftir að ákveðið var að skipa valnefnd um ráðningu framkvæmdastjóra. Guðmundur Bjarnason lét af starfinu fyrr í sumar og hefur Ásta gegnt starfinu síðan.

Stjórn Íbúðalánasjóðs skipaði í lok ágúst valnefnd um ráðningu framkvæmdastjóra úr hópi umsækjenda en Árni Páll Árnason félags- og tryggingamálaráðherra beindi þeim tilmælum til stjórnarinnar að skipa þá nefnd.

Í kjölfarið kynnti Ásta starfsfólki Íbúðalánasjóðs með tölvupósti að hún væri ekki lengur í hópi umsækjenda. Í pósti hennar segir m.a.: „Mitt nafn verður þó ekki í þeim potti umsækjenda sem til greina koma, enda lít ég svo á að þar sem stjórnin treystir sér ekki til að taka ákvörðun, byggða á því ráðningarferli og viðtölum sem nú þegar hafa farið fram, sé það fullreynt að af ráðningu minni verði. Eftir því sem ég best veit hafði fengist meirihluti fyrir ráðningu minni, en ákvörðun hefur enn verið frestað og sett í nýjan farveg með íhlutun ráðherra.“