Strætó mbl.is/Heiðar Kristjánsson

Nú stendur yfir endurnýjun á upplýsingakerfum allra strætisvagna Strætó bs.  Kerfið mun auka upplýsingagjöf til farþega, hjálpa vagnstjórum að halda áætlun og veita stjórnstöð rauntímaupplýsingar um stöðu vagna í akstri. Að auki er stefnt að því að gera kerfið þannig úr garði að það geti tekið við greiðslum með greiðslukorti, samkvæmt fréttatilkynningu.

Grunnbúnaður kerfisins er nú þegar kominn í u.þ.b. 40 strætisvagna og verður allur flotinn kominn með nýja kerfið á næstu vikum. Sumir farþegar hafa þegar orðið varir við fyrstu breytingarnar sem nýja kerfið hefur í för með sér, en þær felast í að nafn næstu biðstöðvar er sjálfkrafa kynnt í hátalarakerfi vagnsins.

Fljótlega munu bætast við upplýsingaskjáir í vögnunum sem veita farþegum upplýsingar um næstu biðstöðvar, birta tilkynningar og fleira.

Meginvirkni nýja kerfisins byggir á að allir vagnar eru útbúnir GPS-staðsetningartæki sem sendir upplýsingar um staðsetningu vagnsins, hraða og akstursstefnu beint til stjórnstöðvar. Allir strætisvagnar eru samstilltir við gervihnattaklukku og vagnstjórar fá stöðugt upplýsingar um hvenær vagninn eigi að vera á næstu biðstöð.

Nýja upplýsingakerfið veitir jafnframt grunn fyrir enn frekari þjónustuaukningu þegar horft er lengra fram í tímann, samkvæmt fréttatilkynningu.

„Til að mynda mun verða hægt að birta upplýsingar á skjám biðstöðva um hve langt sé í næstu vagna auk þess sem farþegar munu geta sótt slíkar upplýsingar á vefinn, t.d. með tölvum eða farsímum. Jafnframt er verið að þróa lausnir sem gera kleift að nýta kerfið til að taka við greiðslum fyrir stakar ferðir með greiðslukortum," segir í fréttatilkynningu.