Perlan í Landeyjahöfn í vor. Ljósmynd / hsig

Dæluskipið Perlan mun leggja af stað frá Reykjavík til Landeyjahafnar um hádegisbil í dag og verður væntanlega komið þangað í nótt, að því er kemur fram á vefnum eyjafréttum.is.

Höfnin hefur verið lokuð frá því á mánudag vegna sandrifs í hafnarmynninu og siglir Herjólfur nú tvisvar á dag milli Vestmannaeyja og Þorlákshafnar.

Haft er eftir Jóhanni Garðari Jóhannssyni, útgerðarstjóra hjá Björgun, hefur skipið verið í reglulegu viðhaldi þessa vikuna en því er nú lokið og er verið að búa það til brottfarar.

Perlan er háð ölduhæð þegar kemur að því að dæla sandinum upp því ölduhæð má ekki vera yfir einum metra. Ölduhæð hefur verið meiri í Landeyjahöfn þar til í nótt, að hún var undir einum metra. 

Jóhann segir að veðurspá fyrir helgina sé hagstæð og ef allar aðstæður séu réttar ætti að vera búið að fjarlægja sandrifið um miðja næstu viku. 

Björgun og dæluskipið Perlan voru við dýpkunarvinnu í Landeyjahöfn í sumar en Jóhann segir aðstæður nú hafa verið afar óvenjulegar. 

„Síðustu ár hefur verið ríkjandi suðvestan átt.  Nú er það hins vegar suðaustan átt sem er ríkjandi og svo bætast við gosefnin úr Eyjafjallajökli.  Þannig að það má segja að það leggist allt á eitt til þess að gera þetta eins óhagstætt og mögulegt er,“ hafa Eyjafréttir eftir Jóhanni.