Perlan að vinna inni í Landeyjahöfn. Ljósmynd / hsig

Dýpkunarskipið Perlan mun leggja af stað til Landeyjahafnar nú síðdegis og hefur vinnu við dýpkun innsiglingarinnar um leið og það kemur á staðinn, væntanlega snemma í fyrramálið. Verður skipið til taks svo lengi sem þörf krefur. Ekki er komin tímasetning á hvenær Herjólfur siglir næst þangað. Þetta kemur fram í sameiginlegri tilkynningu frá Vegagerðinni, Siglingamálastofnun og Eimskip, sem rekur Herjólf.

Eins og fram hefur komið í fréttum undanfarna daga hefur gosefni úr Eyjafjallajökli safnast fyrir utan við mynni Landeyjahafnar með þeim afleiðingum að á fjöru lenti Herjólfur í erfiðleikum í innsiglingu hafnarinnar. Þessa dagana siglir því skipið milli Vestmannaeyja og Þorlákshafnar.

Gera má ráð fyrir að þessi lota við að dýpka innsiglinguna taki nokkurn tíma en ölduhæð ræður mestu þar um. Veður við suðurströndina hefur verið rysjótt eins og jafnan á haust‐ og vetrarmánuðum en Perlan verður til taks svo lengi sem þörf krefur.

Tveggja sólarhringa fyrirvari

„Frá upphafi var gert ráð fyrir því að fyrsta vetur Landeyjahafnar þyrfti töluverðar dýpkunarframkvæmdir í höfninni en almennt ríkjandi suðvestanáttir munu þó eiga stærstan þátt í að fjarlægja gosefnið frá höfninni á haf út.

Í vetur verður Landeyjahöfn áfram aðalhöfn Herjólfs og áætlun miðast við siglingar þangað. Ef þær aðstæður skapast að dýpi verður ekki nægjanlegt mun skipið sigla í Þorlákshöfn en með ölduspám og tíðum dýptarmælingum mun gefast að minnsta kosti tveggja sólarhringa ráðrúm til breytinga á áætlun," segir í tilkynningu.