Geir H. Haarde. mbl.is/Golli

Meirihluti þingmannanefndar Alþingis telur að Geir H. Haarde, fyrrverandi forsætisráðherra, hafi sýnt af sér alvarlega vanrækslu á starfsskyldum sínum sem forsætisráðherra andspænis stórfelldri hættu sem vofði yfir íslenskum fjármálastofnunum og ríkissjóði.

Þingmenn allra þingflokka nema Sjálfstæðisflokks, sem áttu sæti í sérnefnd Alþingis, hafa komist að þeirri niðurstöðu að höfða beri mál gegn Geir, Ingibjörgu Sólrúnu Gísladóttur og Árna M. Mathiesen fyrir landsdómi. Þá vilja þingmenn VG, Framsóknarflokks og Hreyfingarinnar einnig að Björgvin G. Sigurðsson verði ákærður en því eru þingmenn Samfylkingarinnar andvígir.

Í þingsályktunartillögu meirihluta nefndarinnar segir, að Geir hafi verið, eða mátt vera kunnugt um þessa stórfelldu hættu, sem vofði yfir og hann hefði getað brugðist við með því að beita sér fyrir aðgerðum, löggjöf, útgáfu almennra stjórnvaldsfyrirmæla eða töku stjórnvaldsákvarðana á grundvelli gildandi laga í því skyni að afstýra fyrirsjáanlegri hættu fyrir heill ríkisins.

Þá hafi hann látið undir höfuð leggjast að hafa frumkvæði að því, annaðhvort með eigin aðgerðum eða tillögum um þær til annarra ráðherra, að innan stjórnkerfisins væri unnin heildstæð og fagleg greining á fjárhagslegri áhættu sem ríkið stóð frammi fyrir vegna hættu á fjármálaáfalli.

Einnig er Geir talinn hafa hafa vanrækt að hafa frumkvæði að virkum aðgerðum af hálfu ríkisvaldsins til að draga úr stærð íslenska bankakerfisins með því til að mynda að stuðla að því að bankarnir minnkuðu efnahagsreikning sinn eða einhverjir þeirra flyttu höfuðstöðvar sínar úr landi.

Þá hafi hann ekki fylgt því eftir og fullvissað sig um að unnið væri með virkum hætti að flutningi Icesave-reikninga Landsbankans í Bretlandi yfir í dótturfélag og síðan leitað leiða til að stuðla að framgangi þessa með virkri aðkomu ríkisvaldsins.

Loks er Geir talinn hafa vanrækt að gæta þess að störf og áherslur samráðshóps stjórnvalda um fjármálastöðugleika og viðbúnað, sem stofnað var til á árinu 2006, væru markvissar og skiluðu tilætluðum árangri.

Þingsályktunartillaga meirihluta þingmannanefndar