Ingibjörg Sólrún Gísladóttir. mbl.is/Ómar

Ingibjörg Sólrún Gísladóttir segir að sem utanríkisráðherra í stjórn Geirs H. Haarde hafi hún hvorki með athöfnum sínum né athafnaleysi átt þátt í hruni fjármálakerfisins né hafi hún getað komið í veg fyrir fall þess.

Þetta kemur fram í svari Ingibjargar Sólrúnar til þingmannanefndarinnar, sem fjallaði um skýrslu rannsóknarnefndar Alþingis, en nefndin gaf henni færi á að gera athugasemdir við niðurstöður rannsóknarnefndarinnar í sambandi við aðdraganda og orsök falls bankanna 2008.

Ingibjörg Sólrún segir að sem utanríkisráðherra og formaður Samfylkingarinnar hafi hún ekki haft forræði innan stjórnarráðsins á málum sem tengdust fjármálakerfinu eða hagstjórninni. Frá því hún hafi gefið rannsóknarnefndinni skýrslu hafi komið fram sterkar vísbendingar um að eigendur og stjórnendur bankanna hafi með framferði sínu gerst sekir um alvarleg brot sem virðast hafa farið framhjá öllum sem áttu að hafa eftirlit með starfseminni. „Þegar mál eru skoðuð í því ljósi verður heldur ankannalegt að telja að ég hafi haft einhverja þá vitneskju eða afl sem þurfti til að forða fjármálakerfinu frá falli.“

Bréf þingmannanefndarinnar til Ingibjargar Sólrúnar og svar hennar